अहमदाबाद : पोलिसांवर होणारे भ्रष्टाचार आणि गैरवर्तनाचे आरोप लक्षात घेऊन आणि एकंदरीतच पोलीस विभागाच्या कार्यात पारदर्शकता आणण्यासाठी पोलिसांच्या गणवेशावर छोटा कॅमेरा लावण्याचा निर्णय घेण्यात आला आहे. गुजरात पोलिसांनी हा प्रयोग करण्याचे ठरवले आहे. यानुसार सुरुवातीस ६४० पोलिसांच्या गणवेशावर असे कॅमेरे प्रायोगिक तत्त्वावर लावण्याची पोलीस विभागाची योजना आहे.
दंगली, राजकीय सभा, आंदोलने, मारामाऱ्या, छापेमारी अशा प्रकारच्या घटनांमध्ये एक सबळ पुरावा म्हणूनही या कॅमेराचा उपयोग होऊ शकतो, असे सांगण्यात आले आहे. तसेच या कॅमेऱ्यांमुळे पोलिसांच्या हालचालींवरही नजर ठेवता येणार आहे. पोलिसांवर नजर ठेवण्याबरोबरच वाहतुकीचे नियम मोडणारे, भ्रष्टाचार करणारे आदींविरोधात पुरावे जमा करण्यासाठी हे एक उत्तम माध्यम ठरणार आहे. अशी माहिती एका वरिष्ठ पोलीस अधिकाऱ्यांनी दिली आहे.
हा कॅमेरा साधारणतः मोबाइलच्या आकाराचा असेल. तो पोलिसांच्या छातीवर आणि खांद्यावर लावण्यात येणार आहे. तसेच या कॅमेऱ्यात व्हिडिओ रेकॉर्डिंगसह उत्तम प्रतीचे फोटो काढण्याचीही सुविधा असणार आहे. गर्दीच्या ठिकाणी, सभांच्या ठिकाणी, तसेच विविध मोठ्या कार्यक्रमांच्या ठिकाणी हे कॅमेरे पोलिसांच्या गणवेशावर लावले जातील. विशेष म्हणजे कोणत्याही पोलिसाला हा कॅमेरा बंद करण्याची परवानगी नसेल. तसे केल्यास त्याच्यावर कडक कारवाई केली जाईल, असे सहआयुक्त आर. जे. सवानी यांनी सांगितले आहे.
